خليك معانا

مش لاقيين كلام نقوله من شدة الحزن
لا إله إلا الله
و إنا لله و إنا إليه راجعون
بس اللى حصل خلانا لازم نتكلم
لازم كمدونين البلد دى
نقف ايدينا فى ايد بعض فى محن بلدنا
و ولاد بلدنا
اللى حصل كان صعب اوى
كان قاسى اوى
=======
الحادثة
الاتوبيس358البحر الاحمر
تابع لشركة " انتر جولف للسياحة
كان فى طريق عودته بشباب بورسعيد
لحضن بلدهم بورسعيد
لكن القدر و امر الله طبعا
و رعونة و استهتار بارواح ابرياء
منعهم من الحصول على اخر امانيهم فى الحياة الدنيا
بس ان شاء الله هيحققوا كل امانيهم فى الحياة الاخرة
لما كان كل حلمهم فى اللحظات دى
انهم يلاقوا اهاليهم فى انتظارهم فور دخولهم بورسعيد
وجدوا فعلا اهالي بورسعيد كلهم ينتظروهم
ليودعوهم لمثواهم الاخير
نعم اهالى بورسعيد اهاليكم
كلها تبكيكم
و ناخد العزاء فيكم
و ننتظر الصبر عن مصيبتنا
وداعا اخواتنا فى بورسعيد
اهالينا اسر الشهداء
فقد مات ابنائكم شهداء
و لكن الآن لكم آلاف الابناء
فهل تقبلوننا ابناء لكم
نعلم اننا مهما قلنا لم نستطيع ان ننسيكم آلامكم و آلامنا
و حزنكم و احزاننا على فراق احبابكم و احبابنا
و اصدقائكم و اصدقائنا
و لكننا نعلم ان الايمان بالله عامر فى قلوبكم
فلنصبر و لنحتسب
======
اخوانى مدونى بورسعيد فى مدونتنا
نعلن مبادرة مدونى بورسعيد
للتضامن مع اسر الضحايا و المصابين و طلاب كلية تربية نوعية
فى مصابهم و مصابنا الأليم
قررنا نحن مدونى بورسعيد أن
يكون لنا دور ايجابيا فى هذه المأساة
اكيد فى حاجات محتاجنها للمصابين
اكيد عايزين دم
اكيد زمايلهم محتاجين دعم معنوى
لازم نكون اقرب من الحدث علشان نعرف اكتر
ممكن نعمل ايه
الاول احنا هنسأل على موضوع حاجة المصابين للدم دى
هننزل الكلية للطلبة و نحاول نكون جنبهم
ساعدونا بالمعلومات
اللى ممكن من خلالها نساعد و لو بحاجة بسيطة
احنا هنستقبل أى اقتراحات من اى مودن فى مصر كلها
او فى أى حتى فى العالم
من اى انسان عايز يكون معانا فى العمل ده
فكر معانا
دى اقتراحات اللى اتعرضت دى
و متروكة للنقاش
======
ينعى مدونى بورسعيد
اخوانهم من أبناء بورسعيد الذين
راحوا ضحايا لحادث أليم
و يدعون الله لهم بالرحمة و المغفرة
و لاسرهم الصبر و السلوان
و نعلن الحداد فى مدوناتنا لمدة أسبوع
و إنا لله و إنا إليه راجعون
======
للتواصل معانا بالافكار
عن طريق الكومنتات فى البلوج

http://www.portsa3ed.blogspot.com/
او الايميل
portsa3ed@hotmail.com
ولمتابعة تفاصيل الحادث
زورا موقع
www.4portsaid.com

و لانى مدون من مدونى بورسعيد و من الناس اللى متأثرة بالحادث
ادعوكم جميعا للمشاركة فى هذه الحملة
و فى انتظار تواصلكم معها

http://ba7re.blogspot.com/

ادعوكم إلى الإبحار فى بحرى

هتوحشنى يا كريم

الرسالة ده لصديق
قد تكون علاقتى بيه قصيرة
و لكن أشعر دائما انى اعرفه منذ سنوات طويلة
تصدق يا كيم : مكنتش متخيل انى بحبك اوى كده
هتوحشنى جدا
اكيد اللى بيدخل مدونتى لأول مرة هيقول ايه الواد العكننه ده
كل تدويناته فراق و كلام كده
كفايه كده لانى متأثر جدا
و اختم بدعاء
ربنا يكرمك يا كريم و ترجع و أنت محقق كل احلامك يارب
و يديم عليك الصحة و العافية و حب الناس
:( وحشتنى من قبل ما تسافر :(

النهاردة 8 فبراير

أصعب يوم يمر عليا كل عام منذ 3 سنوات

إلي أمى

قلبى و لسانى يذكراك كل يوم

و العين تبكيك كلما تذكرت نصائحك و ذكرياتى معك

و لكن أمر الله نفذ

و إنا لله و إنا إليه راجعون

اعدك ان اكون على العهد و الوعد ما استطعت

=======

على الهامش : كنت محتاج نصايح اوى النهاردة يا أمى

ربنا يخليكى لى يا أم نور و يخليلك نور و نفرح بيها كمان 3 او 4 سنين كده كويس

أسوأ أسبوع

الأسبوع ده أسوأ أسبوع بمر بيه من كل سنة
الأسبوع الأول من فبراير اسبوع الذكريات الأليمة التى لا يمحوها الزمن
فى مثل هذا الأسبوع منذ ثلاث أعوام فقدت حياتى حقا
فى يوم 8 فبراير 2004
رحلت أمى عن عالمنا هذا
رحلت أمى و استاذتى و اعز أصدقائى و أحن القلوب عليا
رحلت انتيمى فى هذه الحياة
نعم فكنا لا نفترق ألا قليلا
كنا نقرأ سويا فى كتب الفقة و نتناقش حولها
كنا نتكلم و نتشاور سويا فى كل شئ
نعم أثرت فى شخصيتى كثيرا جدا
رحلت من احبها بعد الله و رسوله و قبل نفسى
أعلم اننى مهما تكلمت من الصعب انى أعبر عما أنا فيه الآن
شريط حياتى يعود فى هذه الأيام لاعيش أمر و اصعب لحظات سامر بها فى حياتى
الآن انا أعيش فى فبراير 2004 بكل تفاصيله الدقيقة جدا
اعيش صباح يوم الثامن من فبراير
أمى وحشتينى جدا
أمى وحشتينى جدا
أمى وحشتينى جدا

أصدقائى : حياة الأم كنز فلا تتركوه يهرب منكم استفيدوا من هذا الكنز قدر استطاعتكم
رحيل الأم أحساس مرير جدا جدا نعم لقد شعرت اننى كالطفل التايه و اشعر بأنى ينقصى جزء من حياتى
نعم الايام تداوى كل شئ ألا رحيل الأم
رحمك الله يا أمى

أنا و أنا .. نبدأ الحكاية

طبعا اكيد الكل استغرب من قصة أنا و أنا .. قصة صراع دائم
مع ان اللى يعرفنى هيقول صراع
يالطيف اللطف يارب
مش ممكن انا و صراع متركبش
المهم انا هبسط الكلام
أنا و أنا
أنا الاولى غير أنا التانية
أنا الاولى اللى انتوا شايفنها و ده فيها عيوب اكتر من أنا التانية و هى أنا الداخلية
قصة الصراع هو حديث بين الانانتين فى المستقبل
لأن الانتين فى الماضى مختلفوش بيوصلوا لحلول وسط
الحوار اللى انابكتبه دلوقتى هو خوف من المستقبل لتختلف الاناتين
مش عارف حسيت ان الاناتين ممكن يختلفوا
برغم انهم بيحبوا بعض جدا
و بتعجبهم صراحتهم و مناقشاتهم سوا
هقسم الفصول لا
أنا و أنا .. و الارتباط
أنا و أنا .. و العمل
أنا و أنا .. و الحب ( غريبة ده صح ) :)
أنا و أنا .. و الدين
أنا و أنا .. و السياسة
أنا و أنا .. و الاحلامالشخصية
أنا و أنا .. و الاحلام البورفؤادية
أنا و أنا .. و الاحلام العامة
أنا و أنا .. و أحلام لاصدقائى و كيف اراهم من المستقبل
اتمنى انكم من خلال أنا و أنا .. ان اعبر عن نفسى لتيعرفنى أصدقائى كما لو كانوا هم أنا
ملحوظة :أنا و أنا ليس مرض الفصام :) احنا كلنا فينا الانا و الانا دول
: صحيح اختاروا ابدأ اتكلم فى انه قسم ؟

لا تكسر سيفك

لا تلعن حظك ..
لا تكسر سيفك .. لن تخسر
لو يوما مات العشب الاخضر ..
........
فلتبدع شيئا أكبر
و لتنبت فيروزا و خميلا أنضر
و لأنك أنت الغارس يوما عشبك
فاشحذ سيفك يبصر ..
أغمده فى الكلمات الجوفاء
فى وجه العالم لو قطب جبهته أو أنكر
و ادخل ركب الملهوفين ..
.............
مقتطفات أحمد سويلم